眨吓眼BB己經2個月, 我仍在放產期.

BB這個己經開始對聲音反應大了好多, 吃飽會同你笑, 仲開始撩你傾計.

又識得"嘈"我, 話我做乜貢遲先抱佢...

滿月的小健健

唔經唔覺, BB己經滿月啦, 時間過得好快.

小健健由出生時2.59kg, 到現3.23Kg

由48cm 長到50cm,

頭仔由31cm 到34cm.

由一舊只係識食同瞓嘅人仔到而家會比反應, 會跟隨聲音和燈光

還開始懂得笑啦....

我哋做咗Daddy Mammy 啦...

我和XX個愛情結晶品終於响5月9日出世了!!!!!!!!

講返今次生產過程實在係有驚有險. 9號凌晨2:15我突然覺得背脊有一吓刺痛. 下意識話比自己聽, BB要出世了. 起身去廁所睇睇, 係呀, 見紅啦.....立刻打電話去醫院, 個midwife話見紅都未必生得住, 有D人成個禮拜後先生. 吓....唔係吓化.....

貢, 咪惟有繼續瞓, 但中間都有兩三次嘅大陣痛. 但都唔理照瞓. 瞓到7:30就感覺到下體有D嘢湧出嚟.....好似穿陽水喎, 立刻叫xx起身幫我睇吓, 係呀...係呀.....又再打去醫院. 今次midwife,話 ok你入院我哋check 吓啦, 佢仲叫我take my time, 食埋breakfast先. 我仲邊有貢嘅嫻情嘆早餐吖,淋淋聲立嘢去醫院啦.

去到醫院, midwife一checked, 唔....已經進入stage 1 of labour, 叫醫生來睇我, 醫生confirm開咗2度, 我可以做的就只有等....和痛....仲要好痛. xx見我痛到貢, 問我係邊種痛, 刺痛吖, "yuen"痛吖, 抑或點痛, 我話我形容唔到, 總之就好痛.

大概12:00左右, 我頂5順啦, 我話要無痛分勉, midwife又叫醫生, 點知醫生話 "你開到9度啦!唔可以用無痛分勉,.但可以生啦." 我心諗, 貢快, D人唔係話要痛十幾二十個鐘咩???? 乜我貢快?????

跟住醫生就叫用力呀, push 呀.......但由於打咗止痛針, 又聞咗笑氣, 之前又痛到狂叫"我唔生啦, 我以後都唔要生BB", xx見到心都痛埋, 仲喊....講真, 我從來無諗過xx會喊, 事後問返佢, 佢話見到我貢痛, 又乜都做唔到, 好心痛. 原來xx都有呢人性嘅一面, 咪睇佢成日"串串貢"!!!!!!!

跟住醫生見我生咗成個鐘頭都生5到, 決定同我用vacumn, 我只記得有一吓好痛, 跟住BB就出世啦. 係貢, 小健健就嚟咗呢個世界. 但好戲在後頭.

生完之後, 應該要生埋個胎盤, 但又係生咗成粒鐘都生唔到, 醫生決定全身麻醉, 幫我攞個胎盤出嚟, 耍立刻推入手術室, 但攞胎盤時, 同時發現我內出血, 攞咗一舊重1Litre嘅血塊, 計埋之前嘅失血, 我total 失咗1.5L 嘅血, 要立刻輸血. 幸好輸了三包血後, 情况良好. 但xx, 我爸爸媽媽就嚇餐死. 過而家無事啦, 係除咗傷口, 同盆骨痛之外, 都無乜事了......

以為BB會早出世

上個星期日晚上, 好唔舒服, 初初以為BB踢得太勁, 但再仔細感受, 唔係喎, 有啲收縮放鬆嘅感覺...唔通呢D就叫陣痛?????唔通BB要提早三星期出世????xx見到我貢, 又知所措, 見我痛, 又幫我唔到....好心痛.

我同自己講, 若晚上瞓唔到, 依然貢痛, 就一定耍入院. 但瞓上床, 無幾耐就瞓得着, 第二日又無セ事...真係虛驚一場.

Blueberry Muffin

今日係Easter假最後一 日, 老細好人, 放埋我哋星期二. 呢個long weekend 都幾充實.

Good Friday 去咗Venus Bay,

Saturday xx去咗打羽毛球,

Sunday 在家砌床仔, 洗BB衫

Monday 同朋友飲茶

到咗今日可以休息吓, 早上去了做shopping, 下午在家整muffin, 過第一盆靚過第二盆, 第二盆好似燶咗啲啲.

Venus Bay

Easter嘅long weekend 嘅第一日, 我哋同叔叔嬸嬸去咗Venus Bay, Melbourne 駕車去大約2小時, 去Venus Bay 嘅目的, 係去”more” 蜆, 但由於season 唔啱, 所以收獲什少. 我嬸嬸話, 佢舊年去時, 當水退, D 蜆用眼, 用腳都feel 到, 但今次要用勞力挖才挖到11隻….由於要買licence 才可以”more”, 每張licence 要A$6.00, 3 個licence 要A$18, 只挖到11隻, 成本耍成蚊澳幣一隻, 幾貴.

雖然挖唔到蜆, 但個沙灘好靚

xx諗住行出D, 睇吓chance會唔會好D 你睇, 佢哋幾努力

雖然挖唔到蜆, 但個沙灘好靚, 而我就映到D靚日落相. 個咸蛋黄好得.

我哋真係挖到天黑架....
得果11隻, 梗係整唔到一碟油鹽水蜆, 第二朝白咗比xx做白蜆加韓國辛辣麵做早餐.
我唔制.....明年再去過, 起碼挖返佢2-3Kg先得…

34週

今天去醫院覆診, 醫生話一切正常, 個肚亦差不多size. 醫生仲話BB頭仔已轉....開始緊張.....有D擔心, 下次覆診係2星期後, 到時已經36週......唔知會點, 都係唔好諗咁多!

樹上熟

家裡的無花果樹係時候收成, 現在每星期平均都摘到30-40粒, 自己當然食唔哂, 會送D比同事呀, 朋友呀...

這些是今個星期的收獲

香港好少有新鮮無花果, 以前我淨喺見過曬乾咗用嚟煲湯果D, 新鮮嘅覺得唔好食, 仲覺得佢好核突, 但慢慢習慣之後又覺得ok, 而家仲覺得好好味.

細姑姐, Sam 哥哥, 有無留哂口水???!!!!

肥腫難分

進入大肚8個月(32週), 覺得自己好醜樣, 唔信, 有相為証.

其實28週之後, 已經覺得自己ar 吓ar吓, 而且仲成日好倦, 腳仔開始有D腫. 幸好磅數無加好多, 現在都係重咗5.5kg左右.

之前有朋友話個媽咪樣都出咗嚟, 初初自己唔覺, 但睇返以前D相, 又真係好似個樣唔同咗喎!!!!

Yummy Yummy

黃老媽跟黄老爸回港渡假去, 我又開始做當家. 平時放工返到屋企只會煮D簡簡單單, 拿拿淋食完洗完就沖涼瞓.

星期五晚才有心機整吓呢, 整吓路. 剛剛過去的星期五就整咗漢保扒和燒雞. xx都話好味. 燒雞原來難, 我星期四晚用salt & pepper 醃好隻雞 (內外都要), 跟住星期五對入焗爐, 用220度焗一小時, 搞掂, 味道錯架....

Melbourne 也地震

我貢大個女第一次感受到地震, 但同想像的不一樣, 沒有地搖, 人也沒動, 只是D窗震和枱面D嘢震咗幾吓. 只是歷時數秒. 其實在三月六日那晚都震過一次, 但我不在家感受不到, 今次因為在公司做緊嘢, 所以feel 到. 今晚睇新聞話都有4.6級, 而且還會再有...唉!今年Melbourne都係多災多難, 先有bush fire, 跟住又地震...有D擔心.

瞓得覺落...

家吓先啱啱從大海洋路(Great Ocean Road) 返到嚟, 不過這躺旅程容後講。現先快吐前曰阿xx考路試的情況....

xx為咗呢個路試, 揾師傅都補咗幾個鐘, 睇吓有Dセ嘢要注意. 到考試果日, xx懶輕鬆貢走去考試(其實our哂底), 呢邊考試係考排官坐後面, 你個師傅坐你隔離, 所以心理壓力都無貢大. 個試足足考咗45分鐘, 又要窄路掉頭, 又要考泊位, 再考遊車河. 都好在, 返到運輸署, 個考排官就話比xx知.......PASS咗. xx好似執到金貢開心, 差D想攬住個師傅, 果晚返到屋企, 見到xx望住個車牌偷笑, 就知佢今晚瞓得覺落lor.....唔單止xx, 我果晚都瞓得甜D...好lor, 又聽到"dum"一聲...即係又放下一舊大石了.

一肚火

xx於上星期二己經成功pass了兩個考車的筆試, 現在只剩下三月六日嘅路試. 如果pass 埋, 就可以攞澳洲車牌.


但中間都有D小風波, 搞到我要鬧啲死澳洲鬼, 仲搞到我同xx成晚擔心到瞓唔着.


話說要convert oversea licence to Australia licence, xx要考2個筆試, 驗眼和路試. 那天xx考完試之後, 果個人恭喜佢, 隨即話此佢知, 佢已成功取得Learner Permit (在澳洲你可以掛住個L Plate, 有個四年以上車牌嘅人坐响你隔離, 就可以學車, 一定要教車師傳). 但攞咗learner 之後個代價係佢HK個車牌已無效, 仲有要三個月後才可以考路試. 即係話呢三個月一定要full licence坐响隔離,如果係貢, xx怎樣返工? (因為現在HK licence 可以揸三個月)

果日佢考完之後便立刻告訴我呢個good news 同呢個bad news, 我聽完之後覺得唔妥, 剛巧運輸署又在公司附近, 我想一定係言語溝通上出咗問題, 所以淋淋聲走過去clarify一吓, 去猶自可, 一去就火都嚟.

運輸署啲人話响2008年12月23日改咗regulation, oversea 車牌响permanent resident visa簽發後三個月內有效, 但xx個visa係2006簽發, 所以唔可以用, 要重新考過. 我話改咗例點解website無講. website只是說oversea licence要响入境三個月內或PR visa 簽發三個月內有限, 我們一月入境, 即係可以揸到4月啦. 再者website只說convert licence只要考2個筆試, 驗眼和路試, 一丁點都沒有說要再攞learner, 等三個月才可以考路試. 再者, 若改制, 為什麼website上沒有寫? 如果這是真的, 為何我book考筆試時, 果個人問我哋要要一起book 埋路試....我火滾到問完呢堆問題的, 仲要迫佢哋比改制嘅文件我睇....個死八婆話响到架,比咗條link我, 話乜鬼road regulation law. , 好! 我返屋睇完再算.

果晚返到屋企, 好似做律師貢, 睇咗好多文件, website, 睇吓係味真係改咗制......我xyz.!!!....abc!!!!!都無呢回事. 跟住諗第二朝去我屋企附近嘅運輸署再理論. 再打埋電話比教車師傅問怎樣處理. 果晚我同xx都擔心到瞓唔着, 因為响澳洲, 無車=跛....

第二朝一早就去我屋企附近嘅運輸署, 我當セ事都無發生,再問若要convert oversea licence去Australia licence要點, 果個姐姐都係話2個筆試, 驗眼和路試. 我再問若pass咗2個筆試係唔係可以立即報路試, 佢話係, 我再問, 貢使唔駛攞learner, 佢話唔使.....哈哈哈哈, 仲唔中計.....跟住我就和盤托出講哂尋日發生嘅事....跟住果個姐姐叫咗個supervisor嚟, 個supervisor話我哋唔應該攞learner架喎....我話, 鬼唔知咩, 但你另外個office嘅同事話一定要攞之嘛.....跟住個supervisor話同我哋cancell個learner permit,直接book 路試就ok.....你話吖,D死澳洲鬼, 都唔知識唔識......亂貢嚟.....攪到我哋仲鬼死貢擔心!!!!而家淨返三月六日個road test, 希望1 take 過, 貢就一天都光哂lu.

新車落地

經過三個星期嘅research和商量, 我哋終於買咗架車啦. 係Kia Sportage, xx因為成日驚我細細粒,比人恰, 點都覺得要買架中形size嘅車. 加上BB出世後, 又要放BB車, 又要做1個星期嘅shopping, 所以買架中size嘅車都啱嘅.

原本我哋大家都喜歡架Susuki Grand Vitara, 但由於budget問題就選咗呢架. 我test drive咗2次, 除了個engine我覺得嘈D, 同埋無黃媽媽架3,000cc Camry貢好力之外, 大致上都幾ok.

今日放工我同xx就去攞車, 架車己經ready好, 就係呢架啦, 車牌係WXL893, xx己經諗到一個好好嘅方法教大家去記呢個車牌, 係黄大碼.......第二樣又唔見佢貢醒.


新車就xx揸返工, 因為佢話架車要run in, 一早雞咳貢起身, 貢係着車就行人, 又話要煲車, 又話呢, 揸嘅時候又話唔准過3000轉, 又話佬, 又要貢, 又要貢...真麻煩. 車用嚟揸架, 用嚟煲麼.....侷鬼氣, 你揸啦, 我唔揸啦!!!!!!

******

我們的近照, 個肚係唔係仲未好大呢? 家下已經26週, 即係6.5個月. 我個同事就話我都仲係好輕型, 行路都仲好快tim.....重也只是重了4 kg左右, 即係未夠10磅, 可能因為有孕妊糖尿, 所以食嘢好小心...所以無乜點肥啩. 遲D映多D相, 再update大家吧!!

人都癲

上星期Melbourne 經歷了百年一遇嘅連續五天嘅45度高温. 簡直係熱到人都癲. 我屋企就只有廳和爸媽房有冷氣, 所以我和xx搬了出廳瞓.

五日嘅高温把Front and back Yard嘅花花草草曬到燶鬼晒, 我自己就熱到飛起, 每日狂灌水. 肚裡的BB也見得舒服, 瘋狂的踢我.....(鬼咩, 大肚婆嘅體温還要高架嘛).

幸好, 今個星期嘅温度回落返30度左右...否則......

又再整整整.....

食完團年飯, 就到小妹出馬整蘿蔔糕. 今年年初一凑巧是Australian Day, 所以也是Public Holiday, 我們有位馬來西亞朋友邀請我們一起團拜, 每人要bring a dish, 我們就整了蘿蔔糕. 在香港時已幾年無整, 因為工作太忙, 返嚟時間多咗, 可以得閒整吓嘢食.

用food processor 刨好蘿蔔絲, 唔使自己刨, 快好多

炒好料, 但唔記得落江瑤柱

加埋D蘿蔔絲, 炒炒炒

再加漿粉, 入盆,大火蒸一小時製成品

xx第一時間食蒸好嘅糕, 佢話淡咗D, 但都ok, 過失策果晚無入雪框, 唔夠硬, 第日煎時散散地. 過overall都有70分嘅.....

在香港的團年飯

雖然我們人在香港, 但我們都有食團年飯, 今年黃老媽煮了一個下午, 弄了幾味巧手小菜....有

清炒菜心.

蒜蓉煎魚

自家豉油雞
自家自己燒嘅五花腩

還有蒸蝦

雖然街都買到豉油雞和燒肉, 但自家製的是寧捨同的, 加上是愛心團年飯, 梗係啦!!

好消息...

回港前, 去了抽血,內分泌專科醫生擔心我係Type 1糖尿(即係先天性糖尿), 捉咗我去驗血, 其間一直擔心, 因為醫生話好少咁早發覺, 所以要我驗血check 吓. Result出咗啦, 醫生話

唔係.....

YES!!!!!!即係只是因為懷孕才有....好嘢...即係生完就大解放.

另外, 同懶瞓小少爺再照ultrasound, 醫生話一切正常, 個肚嘅size也perfect, 回港時香港個GP話我個size好好, 同埋肥落BB 到, 所以第時收身應該難..... Yes!! Yes!!! Yes....

混亂

離港前一天, 搬運公司到我們家pack嘢, 我哋一共pack 了73箱嘢...真明白我們己沒有傢俬, 只是私人物品, 為何會有貢多嘢.

但搬運公司都勁, 9:00到, 3:00末夠就pack完....xx要暫別他的玩具了....可能要一、兩年才重見天日, 因為可能要一、兩後才買屋呢....

安全到步

和xx回來了數天了, 在港真得累爆了, 回程機上我就睡得錯, xx就給後面的乘客踢背, 攪到成晚無瞓.

在機場我覺得有件幾amazing嘅事發生, 澳洲對食物入口管制非常非常嚴緊, 所有食物都要申報, 經海關檢查, 我因為帶咗茶葉返嚟, 所以當然要申報, 但果日由於太多機到, 所以去到個counter時果人問我有乜, 我話茶葉, 佢問有無chinese seafood, 我話無, 佢竟然話"ok, 你係那邊個exit 出, 用查...." 以我以前在澳生活貢多年, 從未試過.....

呢兩日都係忙於陪xx攪開户口, 醫療咭.....

但xx下星期竟然可能有工返, 我媽咪有個朋友介紹xx去幫人裝冷氣, 果個人話A$50一部, 但未必日日有工開, 我們用急找工做, 返正想xx讀吓"ink門". 報咗移民班, 20/1去interview睇吓讀咩level. 如果可以返三日學, 二日工, 貢就perfect lor.

拜拜2008, 2009新開始

2008話貢快就過咗, 今年真的好忙, 搬了office, 搬了家.

做了二個好大嘅決定, 一係同xx返澳洲定居, 第二個係同xx組織小家庭. 兩個都係現在進行式.....

Christmas回港搞埋D手尾就正正式式嘅撤退香港大本營. 最唔捨得係一班朋友, 尤其係老油雞, 一個認識了差不多三十年的老友記....

2009年將會係一個新挑戰, 新環境, 家庭有新成員, 我到而家都有D未接受自己將會成為一個媽咪, 有時會諗自己係唔係一個稱職嘅媽咪呢?

Anyway,
祝各位新年快樂,

身體健康,

日日都開開心心.....